غير مصنف

قصيدة لمواطن مصري بعنوان “آه من الغلا آه ياني”.. يا حكومة فين حقوقي المدعومة؟

عين نيوز- رصد/

نشرت صحيفة (المصري اليوم) المصرية قصيدة محكية لمواطن مصري يتألم فيها من الغلاء وأسرة عين نيوز قررت إعادة نشرها من باب تعميم الفائدة:غلاء الاسعار

 آه م الغلا.. آه يانى                             كوانى وشد ودانى

 وكبس على نفوخى وصحانى                 من غير سابق إنذار

أهلا بيك لو تشجعنى وتسمعنى                وتعرف أنا إيه اللى وجعنى

مرتبى الموكوس حسرنى وضيعنى            قبل ما يزودوه علوا الأسعار

المرتب زاد والأسعار وياه زادت               والتجار كلها هاصت

أبوخمسة بعشرة وأبوعشرة بعشرين           ياريت ما كان للعلاوه قرار

اللحمة يامة جابتلى صدمة                      والجزار ما ف قلبه رحمة

السكن فى المحلة طوالى بيولع                 ومرتبى المهكع عمال بيتوجع

وصاحب الشقة منفوخ بيتقمع                   بيقوللى يا تخلع يا تزود الإيجار

طب منين هدبر دروس العيال               درس «لمصطفى ومنة وعبدالعال»

وبنتى الوحيدة أتوقف حالها                   تلاتين سنة ومفيش عريس جالها

حلوة ومفيش حد فى جمالها               ياريت عريس «استورجى أو نجار»

الحكومة بتزودنى فى السنة ملاليم          وتفضح الدنيا على «النيل ودريم»

يا سيادة المسؤول أنا مظلوم                  شبعت خلاص حرمان وهموم

نفسى أنام ماصحاش م النوم                    وبلاها عيشة الفجار

ويا ست الحكومات يا حكومة                   فين حقوقى المعلومة والمدعومة

ما هو إنتى برضه الملزومة                    تبعدى عنى الأخطار

إبراهيم جزر – بشبيش- المحلة الكبرى

الكلمات المفتاحية: آه من الغلا- غلاء الاسعار- قصيدة غلاء الاسعار